کوئٹہ لہو لہو:خودکش حملے میں 4اہلکار شہید ،ڈی ایس کی گاڑی پر فائرنگ،دو محافظ جاں بحق

کوئٹہ (دنیا نیوز) کوئٹہ کے نواحی علاقے نوحصار میں ایف سی کیمپ پر خود کش حملے میں چار اہلکارشہید جبکہ 6زخمی ہو گئے ہیں۔سکیورٹی ذرائع کے مطابق دہشت گردی کا یہ واقعہ دہشت گردوں کیخلاف آپریشن کے دوران ہوا۔ دھماکے کے بعد ایف سی اور لیویز نے علاقے کو گھیرے میں لے لیا ہے۔ کوئٹہ کے علاقے سمنگلی روڈ میں ڈی ایس پی کی گاڑی پر فائرنگ سے ان کے دو محافظ جاں بحق ہو گئے تھے۔ نامعلوم موٹر سائیکل سوار دہشت گردوں نے ڈی ایس پی حمید اللہ کی گاڑی کو اس وقت نشانہ بنایا جب وہ اپنی اہلیہ کے ساتھ جا رہے تھے۔ڈی ایس پی حمید اللہ اور ان کی اہلیہ فائرنگ سے محفوظ رہیں تاہم گاڑی میں پیچھے بیٹھے ہوئے ان کے 2 گارڈز شہید اور ایک راہگیر بچہ زخمی ہو گیا۔ وزیر اعلیٰ بلوچستان عبدالقدوس بزنجو نے دہشتگردی کے واقعات کی شدید الفاظ میں مذمت کرتے ہوئے کہا ہے کہ ایسی بزدلانہ کارروائیوں سے ہماری فورسز کا حوصلہ پست نہیں ہو گا۔