نواز شریف کی بیٹی مریم نواز کے بیٹے جنید صفدر کی سیاست میں انٹری

لاہور (مانیٹرنگ ) مسلم لیگ ن یوتھ ونگ کے مرکزی صدر کیپٹن(ر)صفدر اور مریم نواز شریف کے صاحبزادے جنید صفدر نے بھی اپنے نانا نوازشریف، والد کیپٹن(ر)صفدر اور والدہ مریم نواز شریف کی سیاسی سرگرمیوں کو پسندیدگی کی نگاہ سے دیکھنا شروع کر دیا ہے۔

 جاتی امرا رائے ونڈ اور پنجاب ہائوس اسلام آباد میں ان کا مسلم لیگی کارکنوں بالخصوص نوجوان کارکنوں کے ساتھ میل جول بڑھتا جا رہا ہے اور ان کی کارکنوں میں پسندیدگی میں بھی اضافہ ہو گیا ہے۔ 

جاتی امرا کے باہر مقامی لیڈروں نے جنیدصفدر کی تصاویر بھی فلیکسز میں لگانی شروع کر دی ہیں تاہم جنیدصفدر الیکشن لڑنے کی عمر کو نہیں پہنچے ہیں۔

اعجاز الحق نے نواز شریف نے راستے جدا کر لئے

لاہور(مانیٹرنگ)سابق صدر ضیاء الحق کے صاحبزادے اور مسلم لیگ ضیاء کے سربراہ اعجاز الحق نے ایک بار پھر نواز شریف کا ساتھ چھوڑ دیا ۔سماء سے خصوصی گفتگو کرتے ہوئے مسلم لیگ نون سے الحاق ختم کرنے کا اعلان کیاجبکہ ہم خیال گروپ کے شمس حیدر سے ملاقات کی ۔

اعجاز الحق نے جنوبی پنجاب اور آزاد لیگیوں کے ساتھ ملکر الیکشن لڑنے کا اعلان کردیا، ان کا کہنا تھا کہ اداروں سے محاذ آرائی میرا نظریہ نہیں، اس دفعہ دوسری سائیڈ اعتماد نہیں کررہی۔

ان کا کہنا تھا کہ شہبازشریف نے ہمیشہ اسٹیبلشمنٹ سے بات کی، عدالت نےترقیاتی فنڈزروک دیے تو لوگ چھوڑرہےہیں ، ووٹ کوعزت کاکہنے والے خودپارلیمنٹ کوعزت نہیں دیتے۔واضح رہے کہ اعجاز الحق انیس سو اٹھانوے میں بھی ہم خیال گروپ بنانے والے پہلے آٹھ ارکان میں شامل تھے۔

ن لیگ ختم اور نواز شریف کی سیاست ختم ہونیوالی ہے،بلاول بھٹو

ملتان(جیو نیٹ) پیپلزپارٹی کے چیئرمین بلاول بھٹو زرداری کا کہنا ہےکہ (ن) لیگ ختم اور نوازشریف ہمیشہ کے لیے سیاست سے باہر ہوگئے اب مسلم لیگ (ش) اور تحریک انصاف کے خلاف الیکشن لڑنا ہے۔

ملتان میں میڈیا سے گفتگو کرتے ہوئے بلاول بھٹو زرداری نے کہا کہ نوازشریف واحد ہیں جو تین بار پاکستان کے وزیراعظم بنے لیکن ان کے دور میں انہوں نے میٹرو کے علاوہ کیا کیا ہے؟ ہم گنوا نہیں سکتے کہ ذوالفقار علی بھٹو نے کیا کیا کام کیے، انہوں نے غریبوں کو ان کے حقوق دلوائے اور اسٹیٹس کو کو ہلاکر رکھ دیا جب کہ بےنظیر بھٹو نےبھی تاریخ بنائی۔

۔بلاول بھٹو کا کہنا تھا کہ ہم نے جنوبی پنجاب کی محرومیوں کو ختم کرنے کے لیے الگ صوبے کی بات کی، مخالفین مانتے ہیں جنوبی پنجاب کی محرومیوں کو ختم کرنے کے لیے خصوصی اقدامات کی ضرورت ہے۔چیئرمین پی پی نے کہا کہ ہم (ن) لیگ اور پی ٹی آئی کی طرح ایک شہر کو فوکس نہیں کرتے، لوگ پروپیگنڈا کررہے ہیں کہ پی پی نے کچھ نہیں کیا، ہم نے شوبازی نہیں کی، میڈیا ہمارے خلاف پروپیگنڈا کرتا ہے ، ہماری کامیابی نہیں دکھاتے۔

ان کا کہنا تھا کہ (ن) لیگ ختم اور نوازشریف بھی ہمیشہ کے لیے ختم ہوگئے، اب مسلم لیگ (ش) اور پی ٹی آئی کے خلاف الیکشن لڑنا ہے، ان کے امیداور الگ ہوں گے لیکن نظریہ اور منشور ایک ہوگا۔ایک سوال کے جواب میں بلاول بھٹو نے کہا کہ ماڈل ٹاؤن کے معاملے پر پیپلزپارٹی اور دیگر جماعیں کافی دیر سے بات کررہے ہیں، چیف جسٹس کو پہلےنوٹس لینا چاہیے تھا، اب ہم امید رکھتے ہیں کہ شہیدوں کو انصاف ملے گا۔

احتساب سے متعلق سوال پر ان کا کہنا تھا کہ پیپلزپارٹی کا ہمیشہ سے نظریہ رہا ہے کہ ہمارا احتساب کا نظام کمزور ہے اس میں تبدیلی لانا پڑےگی، ہمارے دور میں جو کرنے کی کوشش کی اس وقت مخالفت ہوئی، ہم نے اپوزیشن میں ترمیم لانے کی کوشش کی اس میں بھی مخالفت ہوئی، ہم ایسا قانون چاہتے ہیں جس میں (ن) لیگ کے لیے وی آئی پی احتساب نہ ہو بلکہ سب کے لیے ایک جیسا احتساب ہو، ہم سب کا احتساب چاہتےہیں۔

لوڈشیڈنگ سےمتعلق سوال پر چیئرمین پی پی نے کہا کہ یہ لوگ پانچ سال سے لوڈشیڈنگ کے خاتمے کا دعویٰ کررہے ہیں لیکن لوڈشیڈنگ کہاں ختم ہوئی؟ اگر تخت رائے ونڈمیں لوڈشیڈنگ ختم ہوگئی تو اس کا مطلب یہ نہیں کہ پورےملک میں ختم ہوگئی، ملک میں بجلی نہیں آتی، اوور بلنگ ہوتی ہے، لوگ بجلی کے بلوں کی وجہ سے خودکشی پر مجبور ہیں، حکومت نے صرف ایل این جی کے لیے سوچا، ٹیکسٹائل، مینوفیکچر اور زراعت کے شعبے کو چن چن کر تباہ کیا۔

ازخود نوٹسز کا مقصد بنیادی حقوق کی فراہمی ہے:چیف جسٹس

کوئٹہ(مانیٹرنگ )چیف جسٹس آف پاکستان جسٹس میاں ثاقب نثار کا کہنا ہے کہ انہوں نے جتنے بھی از خود نوٹس لیے ان کا مقصد بنیادی حقوق کی فراہمی ہے۔کوئٹہ میں بلوچستان ہائی کورٹ بار کے عشائیے سے خطاب کرتے ہوئے چیف جسٹس آف پاکستان نے کہا کہ سماجی رہنماؤں کی جانب سے بنیادی حقوق پر پٹیشن دائر نہیں کی گئیں اس لیے ازخود نوٹس لینے پڑے۔

جسٹس ثاقب نثار نے کہا کہ افسوس سے کہنا پڑتا ہے کہ آج تک بلوچستان سے بنیادی حقوق سے متعلق ایک بھی پٹیشن دائر نہیں ہوئی، اس خلا کو پر کرنے کیلئے از خود نوٹس لینے پڑے، میں وضاحت دینے کا پابند نہیں اور نہ ہی کوئی وضاحت پیش کر رہا ہوں لیکن جتنے بھی اقدامات اور سو موٹو ایکشن لیے وہ سب بنیادی حقوق سے متعلق تھے۔چیف جسٹس نے مزید کہا کہ تعلیم، صحت اور خوراک جیسے بنیادی حقوق سے متعلق ازخود نوٹس لیے، سو موٹو ایکشن لینے کا مقصد بنیادی حقوق کی فراہمی پر عمل درآمد کرانا تھا اس کا مقصد جانبداری یا ذاتی فائدہ نہیں تھا۔

انہوں نے کہا کہ میں نے جتنے اقدامات کیے نیک نیتی سے کیے ہیں، میری بلوچستان سے محبت ہے۔چیف جسٹس نے کہا کہ جسٹس قاضی فائز عیسیٰ کی تعیناتی سے متعلق پٹیشن لگانے میں قطعاً کوئی بدنیتی نہیں تھی، کوئی رائے قائم کرنے سے قبل حقائق جان لینے چاہئیں۔چیف جسٹس ثاقب نثار نے کہا کہ ہم عوام کو حقوق دلانے اور فرائض میں کوئی کوتاہی برداشت نہیں کریں گے۔چیف جسٹس نے کوئٹہ میں صوبائی سنڈیمن ہیڈکوارٹر سول ہسپتال کا دورہ بھی کیا اور اس دوران چیف جسٹس نے ہسپتال کے ٹراما سینٹر اور آئی سی یو سمیت مختلف شعبوں کا معائنہ کیا۔

چیف جسٹس سپریم کورٹ میاں ثاقب نثار صوبائی سنڈیمن ہیڈکوارٹر سول ہسپتال پہنچے تو صوبائی حکام اور ہسپتال انتظامیہ حرکت میں آگئی۔کچھ ہی دیر بعد وزیراعلیٰ بلوچستان میرعبدالقدوس بزنجو بھی صوبائی وزیرصحت عبدالماجد ابڑو اوردیگر حکام کے ہمراہ ہسپتال پہنچ گئے۔چیف جسٹس نے ان کے ہمراہ ٹراماسینٹر، آئی سی یو سمیت ہسپتال کے مختلف شعبوں کا معائنہ کیا، ایک خاتون مریضہ بھی چیف جسٹس سے ملی اوراُن سے مدد کی درخواست کی جو انھوں نے وزیراعلیٰ کے سپرد کردی اور وزیراعلیٰ نے جیب سے کچھ رقم نکال کر خاتون کی مدد کی۔

چیف جسٹس ہڑتالی ینگ ڈاکٹروں کےاحتجاجی کیمپ بھی گئے اور ان کےمسائل سنے، اس موقع پران کا کہنا تھا کہ جو جائز مطالبات ہیں وہ تسلیم اور جو ناجائز ہیں انھیں ابھی رد کرتے ہیں، چیف جسٹس نے ڈاکٹروں کو ہڑتال ختم کرکے اپنے فرائض سرانجام دینے کا کہا جس کے بعد ڈاکٹروں نے ہڑتال ختم کرنے کا اعلان کردیا اور جسٹس ثاقب نثار کے حق میں نعرے بھی لگائے۔چیف جسٹس  نے سول ہسپتال میں صفائی کی ناقص صورتحال پر برہمی کا اظہار کرتے ہوئے غفلت برتنے والوں کیخلاف کارروائی کےاحکامات بھی دئیے۔

مشرف کیخلاف غداری کیس کی سماعت کیلئے خصوصی عدالت کی تشکیل مکمل

اسلام آباد(جیو مانیٹرنگ )سابق صدر پرویز مشرف کے خلاف سنگین غداری کیس کی سماعت کے لیے خصوصی عدالت کی تشکیل مکمل ہوگئی۔پرویز مشرف کے وکلا نے سابق صدر کے خلاف غداری کیس سننے والے خصوصی بینچ کے سربراہ چیف جسٹس پشاور ہائیکورٹ جسٹس یحییٰ آفریدی پر اعتراض کیا تھا جس کےبعد انہوں نے خود کو بینچ سے علیحدہ کرلیا تھا۔جسٹس یحییٰ آفریدی کے بینچ سےعلیحدہ ہونے کےبعد عدالت غیر فعال ہوگئی تھی اور وفاقی حکومت نے نئی عدالت کی تشکیل کے لیے چیف جسٹس پاکستان کو خط لکھا تھا۔

جیونیوز کےمطابق چیف جسٹس پاکستان کو نئی عدالت کی تشکیل کے لیے وزارت قانون کی جانب سے خط لکھا گیا تھا۔چیف جسٹس پاکستان نے نئی خصوصی عدالت کی تشکیل کے لیے سندھ ہائیکورٹ کے جسٹس نذر اکبر کو خصوصی عدالت کا رکن نامزد کردیا ہے جب کہ چیف جسٹس لاہور ہائیکورٹ جسٹس یاور علی کو اسپیشل کورٹ کا سربراہ بنانے کی منظوری دی ہے۔چیف جسٹس پاکستان نے وزارت قانون کے خط پر نامزدگی کی منظوری دے کر خط واپس بھجوادیا ہے۔ذرائع کا کہنا ہےکہ چیف جسٹس کی منظوری کے بعد اب وزارت قانون نامزدگیوں کا باضابطہ نوٹی فکیشن جاری کرے گی۔

زرداری پیسہ چلا کر پنجاب فتح نہیں کر سکتے:عمران خان

اسلام آباد(جیو نیٹ )پاکستان تحریک انصاف کے چیئرمین عمران خان کا کہنا ہے کہ آصف علی زرداری کو غلط فہمی ہے کہپیسہ چلا کر سینیٹ کی طرح پنجاب کی وزرات اعلیٰ لے لیں گے۔پاکستان مسلم لیگ (ن) کے اقلیتی نشست پر رکن قومی اسمبلی رمیش کمار کی پاکستان تحریک انصاف میں شمولیت کے موقع پر عمران خان نے کہا کہ پاکستان میں اقلیتوں کو برابر کے حقوق ملنے چاہئیں ۔انہوں نے کہا کہ ہم اقلیتوں کو تحفظ دیں گے اور ان کے حقوق کا خیال رکھیں گے۔ان کا کہنا ہے کہ 2013 کے الیکشن پر تمام جماعتوں نے کہا کہ دھاندلی ہوئی ہے اور دھاندلی میں ریٹرننگ افسران بھی ملوث تھے۔ایک سوال کے جواب میں عمران خان کا کہنا تھا کہ نوازشریف بتائیںپیسہ کیسے کمایا اور باہر کیسے بھجوایا؟، نوازشریف فیملی نے صرف قطری خط پیش کیا جس کو کسی نے قبول نہیں کیا۔

پی ٹی آئی چیئرمین کا کہنا تھا کہ شریف خاندان کی کوشش ہے کہ عدلیہ کو بے توقیر کرکے کرپشن بچالیں لیکن 29 اپریل کومینار پاکستان میں جلسہ کریں گے اور ثابت کریں گے کہ قوم عدلیہ کے ساتھ ہے، سپریم کورٹ کی نئی قیادت پر سب کو اعتماد ہے۔عمران خان نے کہا کہ آصف زرداری کو غلط فہمی ہے کہ سینیٹ انتخابات کی طرحپیسہ چلاکر پنجاب کی وزارت اعلی لے لیں گے۔ان کا کہنا تھا کہ 2013 کے انتخابات میں زرداری اور نواز شریف مل گئے تھے اور مک مکا کرلیا تھا لیکن اس بار پورا زور لگائیں گے کہ غیر جانبدار امپائر مقرر کیے جائیں۔ایک سوال کے جواب میں ان کا کہنا ہے کہ ہم ملک کو معاشی بحران سے نکالنے کے لیے قبل از وقت انتخابات چاہتے تھے مگر کسی صورت انتخابات میں تاخیر نہیں ہونے دیں گے۔

نواز شریف کو ہر بار بچایا انہوں نے چھرا گھونپا،آصف زرداری

لاہور(جیو نیٹ )پیپلزپارٹی کے شریک چیئرمین آصف زرداری نے کہا ہےکہ نوازشریف کو بار بار بچایا اور اس نے ہماری پیٹھ پر چھرا گھونپا۔سابق صدر آصف زرداری سے پیپلزپارٹی کے رہنما عامر حسن نے ملاقات کی جس میں پارٹی امور اور سیاسی صورتحال پر گفتگو کی گئی۔اس موقع پر گفتگو کرتے ہوئے سابق صدر آصف زرداری نےکہا بڑی کوشش کی کہ نوازشریف ٹھیک ہوجائیں اور جمہوری سیاست کریں، ہم نےجمہوریت کی خاطر نوازشریف سے مفاہمت بھی کی لیکن اس کے باوجو وہ نہ سدھر سکے۔سابق صدر کا کہنا تھا کہ نوازشریف کو بار بار بچایا اوراس نے ہماری پیٹھ پر چھرا گھونپا، وہ جمہوریت اور ملک کے لیے نہیں بلکہ اپنی ذات کے لیےسیاست کرتے ہیں۔

بعد ازاں نوابشاہ پریس کلب کی نئی عمارت کی افتتاحی تقریب سے خطاب کرتے ہوئے آصف علی زرداری کا کہنا تھا کہ پیپلز پارٹی بہت بڑی طاقت ہے لیکن کچھ لوگوں کو یہ بات سمجھ نہیں آتی۔انہوں نے مسلم لیگ ن کی قیادت کو تنقید کا نشانہ بناتے ہوئے کہا کہ نواز شریف کے پاس عقل نہیں ہے اور انہوں نے اٹھارہویں ترمیم پر مکمل عمل نہیں کیا۔ان کا کہنا تھا کہ ہم نے جمہوریت کی خاطر 2013 کے انتخابات کو قبول کیا، 2013 کے آر او الیکشن نے ہمیں پنجاب میں الیکشن جیتنے نہیں دیا لیکن وقت آنے پر میاں صاحب سے جمہوری انداز میں حساب لیں گے۔سابق صدر نے کہا کہ میاں صاحب کی حکلومت ڈیڑھ سال میں ختم ہونے والی تھی لیکن ہم نے جمہوریت کو بچانے کے لیے ان کا ساتھ دیا۔آصف زرداری نے کہا کہ اگر حکومت ختم ہو جاتی تو کرسیوں کا گیم شروع ہو جاتا اس لیے نواز شریف کا ساتھ دیا لیکن میاں صاحب نے اچھا صلہ نہیں دیا۔ان کا کہنا تھا کہ میاں صاحب کے ساتھ الیکشن میں مقابلہ ہو گا، وہ بھی اپنے گُر آزمائیں ہم بھی اپنے گر آزمائیں گے۔

ملک میں بادشاہت نہیں،کروڑوں کی بند بانٹ نہیں ہونے دینگے:چیف جسٹس

لاہور(جیو نیٹ )چیف جسٹس پاکستان جسٹس ثاقب نثار نے ریمارکس دیئے ہیں کہ ملک میں بادشاہت نہیں اور کروڑوں کی بندر بانٹ نہیں کرنےدیں گے۔سپریم کورٹ لاہور رجسٹری میں چیف جسٹس پاکستان کی سربراہی میں اسپتالوں کے فضلے سے متعلق ازخودنوٹس کی سماعت ہوئی جس کے سلسلے میں مشیر صحت پنجاب خواجہ سلمان رفیق عدالت میں پیش ہوئے۔سماعت کے آغاز پر عدالتی کمیشن نے اپنی رپورٹ پیش کی جس میں بتایاگیا کہ چیکنگ کے دوران معلوم ہوا کئی اسپتالوں میں مکمل ڈاکٹر ہی نہیں ہیں، چیکنگ کےدوران لکڑی کی راکھ دکھائی گئی جواسپتال کےفضلے کی نہیں تھی۔کمیشن کی رپورٹ پر چیف جسٹس نے اسپتالوں میں فضلے کی تلفی کےناقص انتظامات پر خواجہ سلمان رفیق پر برہمی کا اظہار کرتے ہوئے کہا کہ سنیں ذرا، آپ کے محکمہ صحت میں کیا کیا چیزیں سامنے آرہی ہیں، اس پر خواجہ سلمان رفیق نے کہا کہ ہم بہت بہتر انتظامات کر رہے ہیں۔

چیف جسٹس نے جواباً کہا کہ یہ تو آپ روز جلسوں میں بتاتے ہیں، ہمیں ہمارے سوال کا جواب دیں، فضلہ ٹھکانے لگانے والی مشینوں کی ناقص صورتحال کےبارےمیں بتائیں۔جسٹس ثاقب نثار نے مشیر صحت سے استفسار کیا کہ محکمہ صحت مکمل فلاپ ہوگیا ہے، اس کا تو ککھ بھی نہیں رہا، آپ 10 سال سے ایڈوائزر ہیں، کیا کام کرنےکی کوشش کرتےرہے ہیں؟چیف جسٹس نے کہا کہ پنجاب میں گائنی کی سیٹ پر کوئی اور ڈاکٹر لگا دیاجاتا ہے، پنجاب حکومت کی یہ کارکردگی رہ گئی ہے، خواجہ سلمان صاحب جو کام آپ کر نہیں سکتے وہ چھوڑ دیں۔

شلوار قمیض پہنے ڈاکٹر کے آپریشن کا نوٹس

دوران سماعت چیف جسٹس نے شلوار قمیض پہنے ڈاکٹر کے آپریشن کا نوٹس لیا اور اپنے فون پر خواجہ سلمان کو شلوار قمیض پہنے ڈاکٹر کی تصویر دکھائی۔چیف جسٹس کے تصویر دکھانے پر خواجہ سلمان رفیق نے کہا کہ یہ ڈاکٹر میرے ماتحت نہیں ہے۔جسٹس ثاقب نثار نے ریمارکس دیئے کہ تو پھر آپ کس چیز کے وزیر ہیں؟ ایک وزیر کے پرسنل سیکریٹری کو بھی 3 لاکھ روپےمیں لگا دیا، خواجہ سلمان رفیق صاحب آپ وزیراعلیٰ سے بات کریں گے یا ہم بلائیں، ملک میں بادشاہت نہیں ہے، کروڑوں کی بندر بانٹ نہیں کرنےدیں گے۔

بالی وڈ سپر سٹار سلمان خان جیل سے رہا،7مئی کو پھر پیشی

جودھپور(نیٹ نیوز)کالے ہرن کے شکار کے کیس میں سزا یافتہ بالی وڈ اسٹار سلمان خان ضمانت کے بعد جیل سے رہا ہوچکے ہیں جہاں سے وہ خصوصی چارٹرڈ طیارے کے ذریعے ممبئی روانہ ہوگئے۔سلمان خان کو 2 روز عدالت کی جانب سے 5 سال قید اور 10 ہزار جرمانے کی سزا سنائی گئی تھی جس کے فوری بعد ان کے وکلاء نے سزا پر ضمانت کے لیے درخواست دائر کی تھی۔عدالتی فیصلے کے بعد دبنگ خان کو سینٹرل جیل منتقل کیا گیا تھا جہاں انہوں نے 2 راتیں گزاریں لیکن اب عدالت نے ان کی درخواست ضمانت منظور کرلی ہے۔عدالت نے سلمان خان کی درخواست ضمانت پر 25، 25 ہزار کے 2 مچلکے جمع کرانے کا حکم دیا ہے۔

عدالت نے سلمان خان کو بغیر اجازت ملک چھوڑنے پر پابندی عائد کردی ہے اور انہیں 7 مئی کو پیش ہونے کا بھی حکم دیا ہے۔سلمان خان کو عدالتی فیصلے کے بعد جودھ پور کی سینٹرل جیل سے رہا کردیا گیا ہے جہاں سے انہیں سخت سیکورٹی حصار میں ایئرپورٹ لے جایا گیا جس کے بعد کچھ ہی دیر میں انہوں نے خصوصی چارٹرڈ طیارے کے ذریعے ممبئ کے لیے اڑان بھرلی ہے۔ فیصلے کے وقت دبنگ خان کے مداحوں کی بڑی تعداد عدالت کے باہر موجود تھی جنہوں نے رہائی کے فیصلے پر خوب جشن منایا جب کہ ان کے مداحوں کی بڑی تعداد جیل کے باہر ان کے استقبال کے لیے موجود تھی۔ جودھ پور کی ڈسٹرکٹ اینڈ سیشن جج کی عدالت کے جج روندا کمار جوشی نے آج سلمان خان کی درخواست ضمانت پر فیصلہ سنانا تھا لیکن اس سے قبل جج کا تبادلہ کردیا گیا ہے۔

بھارتی میڈیا کا کہنا ہےکہ راجستھان ہائیکورٹ نےجج روندرا کمار جوشی سمیت 87 ڈسٹرکٹ ججز کے تبادلے کردیئے ہیں۔بھارتی میڈیا کے مطابق کالے ہرن کے شکار کے کیس میں سلمان خان کو سزا سنانے والے جج دیو کمار کھتری کا بھی تبادلہ کردیا گیا ہے۔بھارتی میڈیا کا کہنا ہےکہ ججز کے تبادلے معمول کی کارروائی ہے اور ہر سال 15 سے 30 اپریل کے دوران راجستھان ہائیکورٹ کی جانب سے تبادلے کیے جاتے ہیں۔واضح رہےکہ جودھ پور کی عدالت نے کالے ہرن کے شکار کے 20 سال پرانے کیس میں سلمان خان کو 5 سال قید اور 10 ہزار روپےجرمانے کی سزا سنائی ہے۔

چیئرمین سینٹ کیخلاف بیان،وزیراعظم کیخلاف تحریک استحقاق

اسلام آباد(نیٹ نیوز) وزیر اعظم شاہد خاقان عباسی کے خلاف سینیٹ میں تحریک استحقاق جمع کروا دی گئی۔پیپلزپارٹی نے وزیر اعظم شاہد خاقان عباسی کے خلاف سینیٹ میں تحریک استحقاق جمع کروا دی ہے۔ سینیٹ میں اپوزیشن لیڈر سینیٹر شیری رحمان، سینیٹر فاروق نائیک ، سینیٹر سکندر میندرو، سینیٹر گیان چند، سینیٹر انور لال دین، سید محمد علی شاھ جاموٹ، سینیٹر کرشنا بائی نے تحریک استحقاق جمع کرائی۔

تحریک استحقاق میں موقف اختیارکیا گیا ہے کہ چیئرمین سینیٹ صادق سنجرانی کے خلاف وزیراعظم کا بیان پاکستان کے پارلیمان پر حملہ ہے، وزیر اعظم کے بیان سے پورے ایوان کا تقدس مجروع ہوا ہے، ان کے بیان نے پاکستان کے جمہوری بنیاد کو کمزور کیا۔ تحریک استحقاق میں کہا گیا ہے کہ وزیر اعظم نے چیئرمین سینیٹ اور ہائوس کی توہین کی۔

پولیس اہلکاروں کی پٹائی،چینی انجینئرز قصور وار قرار مگر اختتام پر صلح کرادی گئی

خانیوال(نیٹ نیوز) کبیروالامیں موٹروے بنانے والے چینی انجینئرز اور پولیس اہلکاروں میں جھگڑے کی انکوائری رپورٹ میں چینی انجینئرز کو قصوروار قرار دے دیا گیا۔چینی انجینئرز نے تحقیقاتی رپورٹ تسلیم کرنے سے انکار کردیا۔کبیروالا میں پولیس اہلکاروں کی پٹائی کےمعاملےمیں قصور چینی انجینئرز کا نکلا۔ پاکستان میں چینی باشندوں کی بدمعاشی کی انکوائری میں سب سامنے آگیا۔

آر پی او آفس نے چینی انجینئرز کو جھگڑے کا ذمہ دار ٹھہرادیا۔اجلاس میں دونوں فریقین میں صلح کرادی گئی۔ انجینئرز کو سخت وارننگ بھی جاری کی گئی کہ آئندہ بغیر سکیورٹی  سفر بھی نہیں کرسکیں گے۔انکوائری میں قصورثابت ہواتو چنی انجیئنرز ساری اکڑ بھول گئےاورجن اہلکاروں کو مارا تھا ان کی ہی مختلف پھلوں سےتواضع کی۔آر پی او نے معاملہ تو حل کروا دیا مگرچینی انجینئرزانکوائری کمیٹی کی تحقیقات سے مطمئن نہیں۔کمشنرملتان سے تحقیقات کرانے کی درخواست کردی۔

ملائیشیا کی پارلیمنٹ تحلیل،وزیراعظم نے بڑا اعلان کر دیا

کوالالمپور(نیٹ نیوز)ملائیشیا کے وزیر اعظم نجیب رزاق نے عام انتخابات کے لیے پارلیمنٹ تحلیل کرنے کا اعلان کر دیا۔ملائیشیا کے عام انتخابات بڑے مالیاتی  سکینڈل اور سابق وزیر اعظم مہاتیر محمد کے چینلج کی وجہ سے نجیب رزاق کے حکمراں اتحاد کے لیے سخت آزمائش ثابت ہوں گے۔غیر ملکی خبر رساں ایجنسی ’اے ایف پی‘ کے مطابق سرکاری ٹی وی عوام سے اپنے خطاب میں ’باریسان نیشنل‘ کی حالیہ کامیابیوں کا ذکر کرتے ہوئے نجیب رزاق نے ہفتہ کے روز پارلیمنٹ کو تحلیل کرنے کا اعلان کیا تاکہ عام انتخابات کی راہ ہموار ہو سکے۔

انہوں نے ملک کے ایک کروڑ 49 لاکھ ووٹرز سے انتخابات میں ووٹ دینے کی درخواست کرتے ہوئے کہا کہ ’ہم نے عوام کی خدمت کی اور یہ سلسلہ جاری رکھیں گے۔پارلیمنٹ تحلیل ہونے کے بعد ملائیشیا کا الیکشن کمیشن اگلے چند روز میں انتخابات کی تاریخ کا اعلان کرے گا، جو مئی کے اوائل میں ممکن ہیں۔

مسائل مذاکرات سے ہی حل کریں گے:پاک افغان اتفاق

کابل(نیٹ نیوز)وزیر اعظم شاہد خاقان عباسی نے افغان صدر اشرف غنی سے کابل میں ملاقات کی ہے جس میں پاک افغان مسائل کو مذاکرات کے ذریعے حل کرنے پر اتفاق کیا گیا۔نجی ٹی وی ایکسپریس نیوز کے مطابق وزیراعظم شاہد خاقان عباسی افغانستان کے صدر اشرف غنی کی دعوت پر ایک روزہ دورے پر کابل پہنچے۔ اس موقع پر وزیر خارجہ، وزیر داخلہ، سیکریٹری خارجہ اور قومی سلامتی کے مشیر سمیت گورنر خیبر پختونخوا بھی وزیراعظم کے ہمراہ تھے۔ افغان صدارتی محل میں وزیراعظم شاہد خاقان عباسی کو گارڈ آف آنر بھی پیش کیا گیا۔

’’پاک افغان قیادت میں خوشگوار ماحول میں بات چیت‘‘

بعد ازاں وزیراعظم نے افغان صدر سے وفود کی سطح پر ملاقات کی، جس میں سیکیورٹی معاملات، انسداد دہشت گردی، افغان پناہ گزینوں کی واپسی، منشیات کی پیداوار کے خاتمے، افغان امن عمل اور دوطرفہ تعلقات کی مضبوطی سے متعلق تبادلہ خیال کیا گیا۔ پاک افغان قیادت کے درمیان خوشگوار ماحول میں بات چیت ہوئی اور دونوں رہنماؤں نے علاقائی سلامتی کے مشترکہ اہداف کے حصول پر اتفاق کیا۔

’’پاکستان کا افغانستان کو 40 ہزار ٹن گندم بطور تحفہ دینے کا اعلان‘‘

ترجمان وزیراعظم ہاوٴس نے ملاقات سے متعلق جاری اعلامیے میں بتایا ہے کہ وزیراعظم شاہد خاقان عباسی نے افغان صدر اشرف غنی سے ون ٹو ون ملاقات بھی کی جس میں دونوں ممالک کے درمیان رابطوں کو بہتر بنانے، مسائل مذاکرات کے ذریعے حل کرنے پر اتفاق کیا گیا۔ اس موقع پر پاکستان نے افغانستان کو 40 ہزار ٹن گندم بطور تحفہ دینے اور افغان بر آمدات پر اضافی ریگولیٹری ڈیوٹی ختم کرنے کا اعلان کیا جب کہ وفود کی سطح پر مذاکرات کے دوران پاک افغان تعلقات، افغانستان میں مفاہمتی عمل، مہاجرین کی واپسی سمیت دیگر امور کا جائزہ لیا گیا۔

’’وزیر اعظم کی افغانستان میں قیام امن کیلیے طالبان کو مذاکرات کی پیشکش‘‘

وزیر اعظم شاہد خاقان عباسی نے افغانستان میں قیام امن کے لیے طالبان کو مذاکرات کی پیشکش اور مفاہمتی عمل سے متعلق افغان صدر کے ویژن کو سراہا۔ دونوں رہنماوٴں نے طالبان پر زور دیا کہ امن کے قیام کے لیے وہ کسی تاخیر کے بغیر مذاکراتی عمل میں شامل ہوں۔ دونوں رہنماوٴں نے دو طرفہ اقتصادی تعلقات کو فروغ دینے کے لیے مشترکہ اقتصادی کمیشن کا اجلاس جلد بلانے ، وسطی ایشیائی ریاستوں تک رسائی اور توانائی کے منصوبوں کی جلد تکمیل کے حوالے سے بھی منصوبہ بندی پر اتفاق کیا۔ترجمان کے مطابق ملاقات میں شمن قندھار ریلوے لائن، پشاور کابل موٹر وے کے حوالے سے امور بھی زیر غور آئے، دونوں رہنماوٴں نے چارملکی گیس پائپ لائن تاپی اور بجلی کی فراہمی کے منصوبے کاسا ایک ہزار کی جلد تکمیل پر بھی زور دیا۔

’’وزیراعظم کی گل بدین حکمت یار سے ملاقات‘‘

ترجمان نے مزید بتایا کہ وزیر اعظم نے افغان چیف ایگزیکٹو ڈاکٹر عبد اللہ عبداللہ سے بھی ملاقات کی اور دونوں ممالک کے درمیان قیدیوں کے تبادلے اور قونصلر معاملات پر بات چیت شروع کرنے پر اتفاق کیا۔ دونوں ملاقاتوں میں وزیر اعظم نے افغان صدر اور چیف ایگزیکٹو کو پاکستان کے دورے کی دعوے بھی دی۔ دریں اثنا وزیراعظم نے افغانستان کے مذہبی رہنماوٴں گل بدین حکمت یار، استاد محمد محقق، استاد کریم خلیلی اور پیر سید حامد گیلانی سے بھی ملاقاتیں کیں۔

غزہ میں اسرائیلی فوج کی خونی کارروائیاں،مزید 35شہید،250سے زائد زخمی

غزہ (نیٹ نیوز)غزہ کی سرحد میں احتجاج کرنے والے ہزاروں فلسطینیوں کے خلاف اسرائیلی فورسز کی تازہ کارروائیوں اور فائرنگ سے مزید 35 افراد جاں بحق اور 250 سے زائد زخمی ہوگئے۔فلسطینی وزارت صحت کے مطابق غزہ سٹی کے مشرقی علاقے میں اسرائیلی فورسز کے ساتھ تازہ جھڑپوں کے دوران کی گئی فائرنگ میں 38 سالہ شادی شبات جاں بحق ہوئے جبکہ صبح کے اوقات میں خان یونس کے علاقے میں ایک اور فلسطینی کو مارا گیا تھا۔اے ایف پی کی رپورٹ کے مطابق وزارت صحت کا کہنا تھا کہ تازہ کارروائیوں میں ایک ہزار 70 افراد زخمی ہو گئے ہیں جن میں 293 افراد براہ راست گولیوں کا نشانہ بنے ہیں اور 25 زخمیوں کی حالت تشویشناک ہے۔

وزارت صحت کے مطابق زخمیوں میں 12 خواتین اور 48 کم عمر افراد بھی شامل ہیں۔اسرائیلی فورسز کی تازہ کارروائیوں کے بعد فلسطین میں گزشتہ ایک ہفتے کے دوران ہلاکتوں کی تعداد 29 تک پہنچ گئی ہے جس میں 23 مظاہرین کے علاوہ شہری بھی شامل ہیں، اس سے قبل گزشتہ ہفتے ایک ہی دن میں 19 فلسطینیوں کو ہلاک کیا گیا تھا جس کو 2014 کے بعد خونی ترین دن قرار دیا گیا تھا۔

چیف جسٹس مشکل میں پھنس گئے،کہا معاملات حل نہ کر سکا تو لوگ کہیں گے نعرے لگا کر چلا گیا

اسلام آباد(نیٹ نیوز) چیف جسٹس پاکستان جسٹس ثاقب نثار نے کیس کی سماعت کے دوران ریمارکس دیئے ہیں کہ خواہش ہے کہ جو معاملات اٹھائے ہیں اسے ختم کرکے جاؤں، بعد میں آپ نعرے لگاتے پھریں گے کہ باتیں کرکے چلا گیا اور کیا کچھ نہیں۔چیف جسٹس پاکستان کی سربراہی میں 2 رکنی بینچ نے ادویات کی قیمتوں سے متعلق کیس کی سماعت کی، سماعت کے موقع پر سیکریٹری صحت سمیت دیگر حکام عدالت میں پیش ہوئے اور قیمتوں میں کمی سے متعلق عبور ی رپورٹ عدالت میں پیش کی۔

سیکرٹری صحت نے عدالت کو بتایا کہ عدالت کے حکم کے مطابق ہمیں گیارہ معاملات پر کام کرنا تھا، اس سلسلے میں ہم نے درجہ بندی کرلی ہے۔ چیف جسٹس نے حکام سے قیمتوں میں کمی سے متعلق تفصیلی رپورٹ طلب کرتے ہوئے ریمارکس دیئے کہ مئی کے پہلے ہفتے میں اس معاملے پر مکمل رپورٹ دے دیں، تفصیلی رپورٹ کو دیکھ کر فیصلہ کر لیں گے۔ کسی کا اپیل کا حق متاثر ہوتا ہے تو ہوتا رہے، ہم کسی کو بھی کسی اور فورم پر جانے نہیں دیں گے، مفاد عامہ کے جن معاملات میں ہاتھ ڈالا ہے ان کو یہیں حل کریں گے، کسی کو عدالت جانے کی اجازت نہیں دیں گے۔

سماعت کے دوران جاوید اوکھائی نامی شہری نے عدالت سے استدعا کی کہ ادویہ ساز کمپنیوں کو ٹیکس فری کیا جائے، جس پر چیف جسٹس نے کہا کہ ہمیں عدالت کو پہلے سے بنائے گئے قوانین کے مطابق معاملات کو دیکھنا ہے، ٹیکس کا معاملہ عدالت کے دائرہ اختیار میں نہیں آتا، ٹیکس لگانے یا ہٹانے کا فیصلہ پارلیمنٹ کو کرنا ہے، آپ اگر اس معاملے پر کوئی مہم چلا رہے ہیں تو پارلیمنٹرین سے رابطہ کریں۔فارما بیوروکے وکیل کی جانب سے تاریخ مقرر کرنے کی استدعا پر چیف جسٹس نے ریمارکس دیئے کہ میں آپ سے زیادہ جلدی میں ہوں، میری خواہش ہے کہ جو معاملات اٹھائے ہیں اسے ختم کرکے جاؤں، بعد میں آپ نعرے لگاتے پھریں گے کہ باتیں کرکے چلا گیا اور کیا کچھ نہیں۔ بعد ازاں عدالت نے کیس کی مزید سماعت 15 مئی تک ملتوی کردی۔

نواز شریف کو جوتے مارنے والے ملزم کی رہائی کا پروانا جاری

لاہور(نیٹ نیوز) سابق وزیرِ اعظم نواز شریف پر جوتا پھینکنے کا معاملہ، عدالت نے تینوں ملزمان کی ایک ایک لاکھ مچلکے کے عوض درخواست ضمانت منظور کر لی۔ذرائع کے مطابق سابق وزیرِ اعظم میاں نواز شریف پر جوتا پھینکنے کے الزام میں گرفتار تینوں ملزموں کی ضمانت منظور کر لی گئی ہے۔ لاہور کی کینٹ کچہری کی عدالت کے جج نے تینوں ملزمان کی ایک ایک لاکھ مچلکے کے عوض درخواست ضمانت منظور کی۔

ان تینوں ملزمان کو نواز شریف پر جوتا پھینکنے کے بعد گرفتار کیا گیا تھا۔ جوڈیشل مجسٹریٹ یوسف سردار نے ملزمان کی درخواست ضمانت پر سماعت کی۔ ملزمان عبدالغفور، منور حسین اور محمد ساجد نے درخواست ضمانت دائر کی تھی۔ ملزموں کے وکیل نے عدالت سے ان کی ضمانت کی درخواست کی تھی جسے منظور کر لیا گیا۔ ملزمان کے خلاف چار مختلف دفعات کے تحت مقدمہ تھانہ قلعہ گجر سنگھ میں درج تھا۔

ن لیگ کو ایک اور دھچکا،دو ایم این ایز پی ٹی آئی میں شامل

اسلام آباد(مانیٹرنگ) الیکشن سے قبل ن لیگ کو جھٹکے لگنا شروع ہو گئے، ایم این اے رمیش کمار اور بلال ورک نے تحریکِ انصاف میں شمولیت کا فیصلہ کر لیا، دونوں کی کل عمران خان سے ملاقات ہو گی۔مسلم لیگ (ن) کے ارکان کی تحریک انصاف میں شمولیت کا سلسلہ جاری ہے۔ ن لیگ کے ایم این ایز رمیش کمار اور بلال ورک نے پی ٹی آئی میں شمولیت کا فیصلہ کر لیا ہے۔نجی ٹی وی چینل دنیا نیوز کے ذرائع کے مطابق بلال ورک کل عمران خان سے ملاقات میں پی ٹی آئی میں شمولیت کا اعلان کرینگے۔ بلال ورک این اے 136 ننکانہ صاحب سے ن لیگ کے ٹکٹ پر رکن اسمبلی بنے تھے۔

دوسری جانب مسلم لیگ (ن) کے رہنما اور ایم این اے رمیش کمار نے بھی پاکستان تحریک انصاف میں شمولیت کا اعلان کر دیا ہے۔ رمیش کمار 2013ء میں مسلم لیگ (ن) کے ٹکٹ پر ایم این اے منتخب ہوئے تھے۔چیئرمین تحریک انصاف عمران خان کل رمیش کمار کی رہائش گاہ پر جا کر ان سے ملاقات کریں گے جس کے بعد رمیش کمار ایک نیوز کانفرنس میں پی ٹی آئی میں شامل ہونے کا باقاعدہ اعلان کریں گے۔

خواجہ سعد رفیق کے گرد گھیرا تنگ ،نیب نے بینک اکائونٹس تفصیلات طلب کر لیں

 لاہور(نیٹ نیوز)نیب نے وفاقی وزیر ریلوے خواجہ سعد رفیق اور خواجہ سلمان رفیق کے بینک اکاؤنٹس اور ٹرانزیکشنز کی تفصیلات طلب کرلیں۔نجی ٹی وی چینل ایکسپریس نیوز کے مطابق پیراگون سٹی مین مبینہ کرپشن کے خلاف انکوئری میں اہم پیش رفت ہوئی ہے، نیب لاہور نے وفاقی وزیر ریلوے خواجہ سعد رفیق اور ان کے بھائی خواجہ سلمان رفیق کے خلاف تحقیقات کا دائرہ کار وسیع کر تے ہوئے بینک اکاؤنٹس اور ٹرانزیکشنز کی تفصیلات طلب کرلیں۔

نیب نے خواجہ سعد رفیق اور خواجہ سلمان رفیق کے بینک اکاونٹس کی تفصیلات کے اسٹیٹ بینک کو مراسلہ بھجوایا ہے جس میں کہا گیا ہے کہ اسٹیٹ بینک کے ماتحت پنجاب کے تمام بینکس میں خواجہ برادران کے اکاونٹس اور ٹرانزیکشن کے حوالے سے ریکارڈ فراہم کیا جائے۔ مراسلے کے متن میں 1985 سے لے کر اب تک خواجہ برادرن کے اکاونٹس میں 5 لاکھ سے زائد ہونے والی ٹرانزیکشن کا ریکارڈ طلب کیا گیا ہے۔

ذرائع کا کہنا ہے کہ نیب نے خواجہ برادران کو بینک اکاونٹس کی تفصیلات 3 اپریل تک جمع کروانے کی ہدایت کی تھی تاہم اسٹیٹ بینک کی جانب سے تاحال تفصیلات جمع نہیں کروائی گئیں۔نیب کا اصل کام تفتیش ھے یا تشہیر ۔؟یہ دنیا کی انوکھی تفتیش ھے جسمیں مراسلہ بعد میں ملتا ھے خبر پہلے جاری ھوتی ھے۔ کچھ ثابت نہ ھوا تو میڈیا ٹرائل کا ذمہ دار کون ہو گا ۔۔؟؟

دوسری جانب سعد رفیق کا ٹوئٹ میں کہنا تھا کہ نیب کا اصل کام تفتیش ہے یا تشہیر ؟ یہ دنیا کی انوکھی تفتیش ہے جس میں مراسلہ بعد میں ملتا ہے اور خبر پہلے جاری ہوتی ہے، کچھ ثابت نہ ہوا تو میڈیا ٹرائل کا ذمہ دار کون ہو گا ؟، ہمیں رُسوا کروانے والوں کو کچھ حاصل نہیں ہوگا، ایک دوسرے کی تضحیک سب کو لے ڈوبے گی ، ملکی سالمیت باہمی اتحاد اور آئین کی حکمرانی سے مشروط ہے۔

سپریم کورٹ کے جج جسٹس قاضی فائز عیسیٰ کی تقرری کیخلاف درخواست خارج

اسلام آباد(نیٹ نیوز) سپریم کورٹ نے جسٹس قاضی فائز عیسیٰ کی بطور چیف جسٹس بلوچستان ہائی کورٹ تقرری کے خلاف درخواست مسترد کر دی۔ عدالت نے درخواست گزار سے کہا کہ جب آپ نے پٹیشن دائر کی تو قاضی فائز عیسیٰ سپریم کورٹ کے جج بن چکے تھے، آپ کی تمام باتیں غیر متعلقہ ہو چکی ہیں۔درخواست گزار ریاض حنیف راہی نے موقف اپنایا تھا کہ جسٹس قاضی فائز عیسیٰ کی براہِ راست چیف جسٹس بلوچستان ہائیکورٹ کے عہدے پر تقرری آرٹیکل 196 اور 105 کی خلاف ورزی تھی۔ ججز کا تقرر پہلے ایڈیشنل جج کی حیثیت سے ہوتا ہے، پھر جج بننے کے بعد چیف جسٹس بنایا جاتا ہے۔

چیف جسٹس نے ریمارکس دئیے کہ اگر پوری ہائی کورٹ ہی ختم ہو جائے تو جج کہاں سے لائیں گے؟ چیف جسٹس نے کہا کہ جب آپ نے پٹیشن دائر کی تو قاضی فائز عیسیٰ سپریم کورٹ کے جج بن چکے تھے، آپ کی تمام باتیں غیر متعلقہ ہو چکی ہیں۔سپریم کورٹ بار اور لاہور ہائی کورٹ بار کے وکیل بیرسٹر علی ظفر نے کہا کہ یہ معاملہ قانون کی حکمرانی اور عدلیہ کی خود احتسابی کا ہے، بارز چاہتی ہیں کہ سپریم کورٹ آرٹیکل 184/3 کے تحت اس معاملے کا فیصلہ کرے۔ وزیر اعلیٰ اور گورنر کی آئین کے تحت مشاورت کے بغیر ہی جسٹس قاضی فائز عیسیٰ کا تقرر کیا گیا۔ عدالت اوگرا اور نیب میں تقرریوں سے متعلق ریکارڈ طلب کرتی رہی، اس معاملے میں بھی کرے۔چیف جسٹس نے کہا کہ اس معاملے میں ریکارڈ طلب کرنا ہمارا کام نہیں ہے، مشاورت نہ ہونے کے شواہد آپ دیں۔ عدالت نے مطمئن نہ ہونے پر درخواست خارج کر دی۔

ن لیگ کی مشکلات میں اضافہ،دو وفاقی وزیر مملکت اور ارکان اسمبلی نے پارٹی چھوڑ دی

کوئٹہ (مانیٹرنگ ) بلوچستان سے مسلم لیگ ن کے تین ممبران اسمبلی نے پارٹی چھوڑنے کا اعلان کردیا۔نیشنل پریس کلب میں پریس کانفرنس کرتے ہوئے بلوچستان سے مسلم لیگ ن کے تین ممبران اسمبلی وزیر مملکت پٹرولیم جام کمال وزیر مملکت سائنس و ٹیکنالوجی دوسطین خان ڈومکی اور خالد مگسی نے نیشنل پریس کلب میں پریس کانفرنس کرتے ہوئے پارٹی چھوڑنے کا اعلان کر دیا۔

پریس کانفرنس میں تینوں لیگی رہنماوں نے پارٹی کے علیحدگی کے ساتھ ساتھ شکایتوں کے انبار لگادیئے، ان کا کہنا تھا کہ ہم قومی اسمبلی میں پہلی بار آئے تھے ایک سال میں بہت کچھ سیکھا ہے ۔بلوچستان کے مفادات کو بڑی پارٹیوں میں کوئی تحفظ نہیں دیتا، ان کا کہنا تھا کہ ہمارے حلقوں کو بھی کچھ نہیں ملا، ہم نے کئی بار نواز شریف اور وزیر اعظم شاہد خاقان عباسی کو متعدد بار آگاہ کیا ۔ان کا کہنا تھا کہ پارٹی کی صوبائی قیادت نے ہم پر بہت سختی کی لیکن کسی نے ہمارے مسائل پر توجہ نہیں دی۔